Par Jacques HALLIEZ. (mai 1998).
 

In intind souvint dire : " j’vas in pélérinache ",
Ch’t’eune mote du temps passé dins nos villes et villaches.
Ichi à Valinciennes, in suit l’ Tour Saint-Cordon,
Mi, pindant les vagances, j’ raqueurs à Saint Pichon.

Comme vous z’êtes point trop dur ed’ comperdo, j’vous dis
Qu’ i’ a d’puss qu’un cop d’ cholette, qu’i faut six heures et d’mi
Pou arriver là-vau, au fin fond de l’ Vendée.
N’ brayez point, acoutez : ch’ t’ à Vouillé-les-Marais.

Ch’est là qu’ Serge et Arlette, nos amisses ed’ toudis,
Ont eun’ mason d’ campane, l’ pus biau des paradis
Pou les pêqueux à line, pou tous ces fiers à bras;
In plus, sûr et certain, qu’ y a un microclimat. 

E’ c’ jour-là, comme in dit, i pleuvot à z’ yeux d’ vaques,
Pou’ cause d’ microclimat, j’ tos sans imperméap’,
Un vieux sac à ciment r’montot su mes épaules,
In bas, eun’ aut saquoi arcouvrot mes guiboles.

I’ faisot point un temps à mette un tchien déhors,
L’ z’ abobilles étotent prêtes, fallot y’aller alors,
Les fifisses s’ torténottent aussi bin qu’ les molons
Avec ed l’ amorsache, pou’ l’pichon ch’est l’ gâtiau.

A ch’ t’ heure, faudrot d’ el iau pour cruïr el’ pourrette.
Habile, d’allonne rimplir em’ gamelle à coupette !
Sitôt dit, sitôt fait, bin pus vite qu ‘un lumechon
J’ queurs au bord du rucheau in traversant l’ ponton.

A peine qué j’ai posé mes petons su’ l’ planquette
Glichante comme du parquet frotté à l’ savonnette,
Qu’ je m’ sins filer bin vite, perdant min équilipe,
Pou l’ grand saut au tremplin à les Jeux Olympiques.

" A’pa, a’man ", j’hurlos au mitan du plongeon ;
Me v’là sans crier gare par pus d’ tros mètes ed’ fond !
Mais i’ faut qué j’ vous disse, j’ai fait bien attintion
Avant d’ débirouler, d’ printe em’ respiration.

Tout d’in cop, j’oufe des yeux aussi grands qu’ des ferniettes
Parc’ qu’ au d’vant d’ mi, j’ vos v’nir eun tout’ jone gadrouillette
Motié fimme et pichon, ch’ est sûr, v’ là eun’ ondine
Torténant du croupion tout comme eun’ gourgandine.

Des clins d’ eul, alle m’in fait tant à tire-larigot
Qué j’ m'approche l’cœur buquant! Qu’est-c’que j’vos dins sin dos
Muché, l’ gueule intr’ouverte ? Ch’ est l’ brochet à leunettes
Prêt à m’ mette dins s’ païelle avec eun’ écoeumette.

Min sang, i’ n’ fait qu’un tour, ej’ donne un cop d’ talon
Et j’ armonte comme eun’ flèche, comme un boulet d’ canon.
Ej’ souffelle comme eun’ forche, ej’ mé sins tout fav’lotte .
Infin, j’ sus récappé, mé v’ là sorti d’el flotte.

" J’ sus chi prope ! " qué j’ mé dis, in dirot un martien
Avec des brins d’ roguet² collés dins tous les coins,
Et traînant derrière mi du foufrin, verte jonqure,
Tout imberfiqué à l’ intour dé m’ cheinture.

J’ n’ai point d’mindé min resse, j’ai r’queuru à l’ mason.
Su l’ pointe ed’ mes sorlets, arpassé l’ portillon,
Pa’ l’ cassis j’sus rintré, j’ai fait semblant dé rien
Pour l’ moutrer à personne, j’m’ai mis sur m’ trente et un.

Arlette alle l’a séhu, Serge i’a croulé l’ ponton.
Quand jé l’ vos, d’ pus c’ jour-là, arzieuter sin bouchon
Pindant des heures intières, j’ cros bin qué c’ polisson
I’ voudrot à sin tour arluquer l’ fimme - pichon.

Jacques HALLIEZ. Mai 1998

1* Le Grand Booth : canal du Marais Poitevin

2* Des lentilles d'eau