Par Jean CARDON

I’ faut dire qu’el campeur i’ passe sin timps comme i’ peut ! pou’ certains, ch’est l’vélo, pou’ l’z’aut’s, ch’est l’jeu d’boules, o bin l’manile, et pou’ les pus capapes, ch’est l’bridche.
Nous, in va à l’ pêque.
Là incor, i’ faut bin distinguer cheux qui pêquent au coup, cheux qui pêquent à l’inglaisse, et i’n’d’a même qui pêquent à l’mouque !
Nous, in pêque à l’tanche !
Si bin qu’in après-midi, pou’ qu’les fimmes all peuchent berdouiller autour d’in’ tasse ed jus, in s’apprête et in débuque avec tous nos bagaches !
Arrivés au bord ed l’ieau , in déballe not’ matériel (ch’est toudis là qu’el fil i’ s’immêle), in prind l’ fond (i’ n’d’a même qui n’hésitent point à plonger pou’ l’mesurer  comme ch’est déjà arrivé !) pis, après inn bonne heure, nous v’là in pleine action ! Attintion ! quand un péqueux est in pleine action, ch’est qu’i’ pique un roupillon !
Qué bieau timps qu’i’ faisot ! In intindot l’z’osieaux canter dins l’z’apes, les guergnoulles coasser in faisant un raffut d’diape , pis y’avot les moustiques qué j’allos oublier !
Bref, tout d’un cop, i’ n’d’a in qui crie « puisette » ! Nous v’là tertous su’ l’pied d’guerre : pou’ in bieau pisson, cha d’vot ête un bieau pisson ! In véïot l’scion qu’étot ploïé in deux, et l’élastique qui dépassot ed pus d’un mète . Comme diso ch’ti qu’i’ avot in bleu à sin bras « i’ dot ête comme cha ! »
Chacun i’ donnot sin consel « Laisse du mou ! desserre el frein !…)
Quos qu’in vot alors? El tanche qui r’monte au ras d’l’ieau, pis qui s’rinfonce ed nouvieau. Y’a l’copain qui crie : «  In dirot qu’j’ai vu du poil ! » In l’ravette in riant, pinsant bin qu’i’ avot cor’ forché su’ l’apéro du midi !
Mais v’là qu’in vot les yux et les moustaches d’el tanche ! Qué surprisse ! Mais ch’étot guère possipe ! Ch’étot un rat qu’i’ étot v’nu s’régaler avec el maïs ed l’amorce !
In r’tourne viv’mint nos puisettes, et in i fout des cops d’bâton si bin qu’el pauf rat i débuque dins un tro, pas-d’zous nos pieds, avec l’hamm’chon, les plombs et pis l’bouchon !
Y’avot pus rin au bout d’el line, si ch’n’est in débout d’fil tout raguerpi !
Véïant cha , in a t’nu in consel ed guerre, et in a décidé d’sin raller des fos qu’ el famille Rat s’rot cor à tape in train d’minger l’reste du maïs !
In r’vénant au terrain bin saisis, comme toudis, les blincs-bonnets nous ont d’mindé « Combien de kg avez-vous pris aujourd’hui ? » et nous in a raconté not’ avinture ! Tertous s’marrot, bin sûr, et qu’os’ qu’in s’est fait mette in boîte !
C’pindant, croïez min, à chaqu’ fos qu’in s’ertroufe insinne, i n’d’a toudis in qui r’met su’ l’tapis l’histoire d’el tanche à quate pattes !

Jean Cardon